DE GÜELTA AL PUEBLU

Hola Nocencio qu'hay amigu Pedru !cuantu tiempu sin velmus! desdi quinci añus que me jui del pueblu. Cuentame, cuentame, imi quien s'a muertu, estu paici que no cambia paici lo mesmu. Calla hombri calla, no igas isparatis; manque a simpli vista paezca lo mesmu, en ná se paici a lo d'andenanti. Y si no, levanta la mollera y mira los tejaus, tos llenus de alambris, en toas las casas unu manque en argunas s'este pasandu jambrí. La envidia mos esta perdiendu esta n'es, lo qu'era antís. Además la puta imigración arrea con lo mejol de nuestra carni, ca dia van queandu menuh que tengan ahincus pa quealsi, que sian capacis de labrar la tierra qu'intentin echal estu pa lanti. Yo entiendu que sus dejeis lleval pol el luju y los cochis elegantis, pol lah cuatru perrinas máh que pagan si trebajas de esclavu pa loh grandis qu'aluegu sus gastais en boticas pa curar enfermedadis, qu'abeis adquiriu en las fabricáh de loh mesmus dueñus de hospitalis, qu'asi jacin el negociu reondu, al pagar pocu pol el trabaju insanu y cobrar mucha al curar enfermeadis. Peru aqui, tamien tenemus cosas güenas, tenemus un sol, que mus saluda a la mañana, un sol que se espidi pol la tardi, ademáh, el vientu mos abraza sin rodeus, con un cariñu que envidian muchas maris el mesmu airi que mus da la vida le gusta de musotrus embriagalsi, se mus meti en los pulmonis con jolgoriu pa luegu alli adentru esparramarsi, Estu mos prouci alegrias que no son pa contalsi, y nos deja un estau de salú que los ricus no puein pagalsi, ya se que to no son ventajas; peru pa que veas, tamien aqui tenemus d'ellas una parti. david 5 - 1980